Rauði kross Íslands hefur komið að málefnum hælisleitenda á Íslandi frá 1987 með ýmsum hætti. Meðal annars sá hreyfingin um umönnun hælisleitenda til loka árs 2003. Nú starfar Rauði krossinn að málefnum hælisleitenda í samræmi við samkomulag við dóms– og mannréttindamálaráðuneytið frá árinu 2004. Rauði kross Íslands hefur heimild til að fylgjast með meðferð mála þeirra sem sækja um hæli hér á landi sem og aðbúnaði þeirra, meðal annars með því að eiga viðræður í trúnaði við hælisleitendur. Rauði krossinn sinnir málsvarahlutverki fyrir hælisleitendur og útvegar lögmannsaðstoð þyki ástæða til.

Frá því í október 2006 hefur hópur heimsóknarvina hjá Hafnarfjarðardeild heimsótt hælisleitendur einu sinni í viku.

Hælisleitendur er sá hópur fólks sem sækir um hæli á Íslandi og óskar þar með eftir að fá viðurkenningu á stöðu sinni sem flóttamenn. Á meðan að á málsmeðferð stendur búa hælisleitendur á gistiheimili í Njarðvík í umsjón Félagsþjónsutunnar í Reykjanesbæ samkvæmt samningi þeirra við Útlendingastofnun. Rauði kross Íslands sinnir réttindagæslu fyrir hælisleitendur.

Hælisleitendur búa við mikla félagslega einangrun og eru undir miklu andlegu álagi. Hópurinn sem sinnir heimsóknum hefur það að markmiði að rjúfa þessa einangrun og létta fólki lífið og biðina á meðan á málsmeðferð stendur. Þrír til fjórir heimsóknarvinir heimsækja hælisleitendur hverju sinni.

  

Hópurinn sem sér um félagsstarf fyrir hælisleitendur starfar saman sem einn hópur. Þau skipuleggja og framkvæma mánaðarlegt félagsstarf og viðburði s.s. spilakvöld, bíókvöld, matarkvöld, dagsferðir o.fl. Verkefnið hentar einkar vel félagslyndu, hugmyndaríku og úrræðagóðu fólki sem á auðvelt með að skipuleggja viðburði fyrir ólíka markhópa.

Réttindagæsla fyrir hælisleitendur er ætluð lögfræðinemum  á þriðja ári eða lengra komnum í HÍ og HR auk útskrifaðra lögfræðinga. Réttindagæslufulltrúar starfa með hælisleitendum á fyrstu stigum málsmeðferðar þegar hælisleitendur eiga ekki rétt á lögmannsaaðstoð á kostnað ríkisins. Réttindagæslufulltrúi fylgir hverju máli frá upphafi til enda. Haldin eru sérstök undirbúningsnámskeið fyrir réttindagæslufulltrúa sem valdir eru til þátttöku í verkefninu að undangegnum viðtölum.

Sjálfboðaliðar sem starfa sem stuðningsfjölskyldur taka að sér að styðja þá hælisleitendur sem hér hljóta alþjóðlega vernd að undangenginni hælismeðferð. Stuðningurinn fellst í félagslegum stuðningi, að aðstoða nýjan íbúa við að fóta sig í nýjum og oft framandi aðstæðum. Stuðningsfjölskyldur skuldbinda sig til þátttöku í verkefninu í eitt ár. Allir sem áhuga hafa á geta sótt um að gerast stuðningsfjölskylda, jafnt einstaklingar sem stærstu fjölskyldur, enda eru fjölskyldur af öllum stærðum og gerðum. Verkefni stuðningsfjölskyldna hefur vakið verðskuldaða athygli um víða veröld sem fyrirmyndar verkefni í aðstoð við flóttafólk.

Þeir sem hafa áhuga á að gerast sjálfboðaliðar í verkefnum með hælisleitendum hafa samband við okkur í síma 565-1222 eða senda póst á hafnarfjordur@redcross.is.

Allir sjálfboðaliðar gangast undir ákveðna undirbúningsþjálfun sem fer eftir því í hvaða verkefni þeir taka þátt. Sjálfboðaliðar skrifa undir sjálfboðaliðasamning sem felur í sér að þeir fallast á að vinna undir grundvallarmarkmiðum Rauða kross hreyfingarinnar auk þess sem þeir skrifa undir trúnað gagnvart skjólstæðingum Rauða krossins.

Til að starfa í heimsóknum til hælisleitenda er gerð krafa um að sjálfboðaliðinn hafi náð 23ja ára aldri og tali reiprennandi a.m.k. eitt erlendt tungumál(að Norðurlandamálum undanskildum).  

Ég vil gerast sjálfboðaliði