Garðabæjardeild hefur í samvinnu við Álftanesdeild Rauða krossins farið af stað með verkefnið Föt sem framlag fyrir börn 2-12 ára. Deildirnar hafa fengið til samstarfs við sig skóla í Garðabæ og á Álftanesi. Börn í skólunum safna fötum og pakka þeim í sérstaka poka sem sendir eru til Hvíta Rússlands. Innihald pakkanna er staðlað svo ekki sé mikill munur á þeim. Fleiri upplýsingar um þetta verkefni er að finna hér.

Prjónahópur Garðabæjardeildar hittist tvisvar í mánuði á miðvikudögum í húsnæði Garðabæjardeildar Rauða krossins á Garðatogi (Hrísmóum 4). Þar eru prjónuð hlý föt sem nýtast í neyðaraðstoð erlendis sem og hér heima.

Vel er tekið á móti nýjum sjálfboðaliðum í skemmtilegum hópi sem á góðar stundir saman við hannyrðir sem nýtast til góðs. Garn er á staðnum en gott er ef sjálfboðaliðar hafi prjóna eða heklunál meðferðis. Einnig er velkomið að koma með eigið prjónadót.
Kaffi er á staðnum og með því.

Við viljum alltaf bæta góðu fólki í hópinn og er öllum velkomið að koma með einhvern með sér.

Áhugasamir hafi samband við Hrafnhildi Kvaran í síma 565-9494 eða í gegnum netfangið gardabaer@redcross.is.

Einstaklingar og hópar vinna ákaflega merkilegt hjálparstarf með því að vinna ungbarnaföt sem send eru til alþjóðlegrar neyðaraðstoðar. Fötin eru meðal annars gerð úr afgöngum og góðum notuðum efnum.

Í þróunarlöndum og á svæðum þar sem neyðarástand ríkir er víðast mikill skortur á barnafötum. Í fatasöfnunum berst minnst af barnafötum. Handavinnuverkefnið Föt sem framlag miðar að því að draga úr þessum skorti. Þörfin er brýn og allir geta lagt sitt af mörkum til að aðstoða þá sem þurfa á fötum að halda. Frá janúar til september 2009 voru sendir út 2.300 pakkar af ungbarnafatnaði.

Rauði kross Íslands lætur í té uppskriftir og snið af fötunum. Öll vinna við verkefnið er sjálfboðavinna. Rauði kross Íslands kemur fötunum á áfangastað.

Flutningafyrirtækin Eimskip, Landflutningar og Flytjandi veita fataverkefninu ómetanlega aðstoð.
Fatasöfnun Rauða krossins er staðsett að Skútuvogi 1, Reykjavík, sími 587 0900, netfang fataflokkun@redcross.is